Министерството за информации и телекомуникации на Србија соопшти дека властите во Приштина во вторникот вечерта му забраниле на министерот за информации и телекомуникации, Дејан Ристиќ, да влезе на територијата на Косово.
Како што се наведува во соопштението, причина за планираниот престој на српскиот министер на Косово било присуството на свеченоста по повод 80-годишнината од постоењето на неделникот „Јединство“, единствениот печатен медиум на српски јазик во Косово, кој ќе ќе се одржи денеска во Домот на културата во Грачаница.
„Иако посетата на министерот на Косово беше навремено најавена согласно утврдената процедура, таа беше забранета еден час пред предвидениот термин за преминување на административната линија“, се наведува.
Се додава дека забраната за влез и престој на територијата на Косово за министерот задолжен за информации од јавен карактер претставува уште еден нескриен пример на повреда на правото на слободно движење, слободата на јавно информирање и слободата на изразување на припадниците на српскиот народ во Косово.
Министерството ја повика меѓународната заедница најостро да ја осуди оваа „антидемократска одлука“.
Од друга страна, косовскиот премиер Албин Курти ја коментираше одлуката на Централната изборна комисија на Косово (ЦИК) да не ги сертифицира кандидатите од Српската листа за парламентарните избори, на иницијатива на членовите на Движењето Самоопределување.
Тој посочи дека Српската листа е „многу проблематична“ и дека ставот на претставниците на неговата партија не можел да биде поинаков.
Потсетувајќи се на нападот на каналот Ибар - Лепенац, тој рече дека зад него стои Милан Радоичиќ, а бил финансиран од Србија.
„Да не заборавиме дека Српската листа беше многу проблематична и пред терористичкиот напад во Бањска. Ситуацијата ескалира кога по налог на Белград тие поднесоа оставки во Обвинителството, судството, локалните општини и Собранието на Косово на 5 ноември 2020 година. Кога на тоа ќе се додаде терористичкиот напад на Бањска извршен од заменик-претседателот на Српската листа, Милан Радојичиќ, кој и денес 'де факто' шеф на Српската листа, бидејќи нејзините експоненти се среќаваат со него во Србија, добиваат наредби од него, јасно е дека нашиот став, како Самоопределување, не можеше да биде поинаков“, рече Курти.
Централната изборна комисија на Косово во понеделникот не ја потврди изборната листа на партијата Српска листа за учество на парламентарните избори на 9 февруари.
Српската листа е најголемата партија на косовските Срби, која има поддршка од Белград.
Претставниците на владејачката партија, Движењето Самоопределување, се спротивставија на верификацијата на оваа партија, велејќи дека не го признава Косово.
