Протестите со барање за истрага и расчистување на сомнежите за изборни нерегуларности во Србија продолжија и денеска.
Демонстрантите, претежно студенти, се собраа во 11 часот пред Министерството за државна управа и локална самоуправа во Белград, а им се придружија и демонстрантите од Нови Сад.
Демонстрантите ги прочитаа нивните критики и барања, а првата точка се однесува на, како што тврдат, нерегуларностите во креирањето на избирачките списоци и регистрацијата на избирачите.
Тие се сомневаат во кражба на гласови на избори и несоодветно постапување со изборниот материјал.
Осврнувајќи се на уставното право на слободни избори, демонстрантите порачаа дека секој поединец има право на избор и дека не треба да има принуда.
Тие бараат проверка и ажурирање на избирачките списоци и истрага за сомневањата за кражба на гласови.
Како што најавија претходно, доколку не добијат потврден одговор на нивните барања од Министерството за државна управа и локална самоуправа, демонстрантите протестот ќе го продолжат со сообраќајни блокади на две локации во главниот град на Србија.
Од друга страна, началникот на Управата за полиција Ивица Ивковиќ изјави дека „денес се очекува блокада на Министерството и на Бранков мост“, не прецизирајќи дека студентите ќе бидат тие што го блокираат мостот.
Тој додаде дека „нема да се толерираат блокади на државни институции и мостови“ и дека ќе се поднесуваат пријави.
Од минатата недела Белград е место на протести кои ги повика коалицијата „Србија против насилството“ со барање за откажување на изборите, поради нерегуларности.
Протестите се одржуваа пред Републичката изборна комисија со почеток во 18 часот.
