Тројца загинати, 11 повредени во железничка несреќа во Хрватска

Три лица загинаа, а 11 се повредени во тешка железничката несреќа кај Новска во Хрватска што се случи синоќа околу 21.30 часот и 30 минути.

Жупанискиот центар 112 Сисак синоќа во 21 часот и 31 минути добил дојава за судир на патнички и товарен воз што се случил на околу два километри од станицата Рајиќ во Новска, соопшти Министерството за внатрешни работи на Хрватска.

Патнички воз што сообраќал на локалната линија Винковци - Новска налетал на запрен товарен воз, при што вагоните на патничкиот воз излетале од пругата
.
На местото на несреќата се испратени екипи на итна медицинска помош, пожарникари, полиција и други служби, а на местото на несреќата нешто по полноќ пристигнале и хрватскиот премиер Андреј Пленковиќ, министерот за внатрешни работи Давор Божиновиќ и други високи функционери.

Андреј Пленковиќ во синоќешното обраќање до медиумите оцени дека станува збор за една од најтешките железнички несреќи во Хрватска. Тој потврди дека загинале три лица, додека 11 лица се повредени и додаде дека конечните бројки ќе бидат утврдени откако вагоните ќе бидат отстранети од колосек.

Повредените, кои според неофицијални информации засега не се во животна опасност, се пренесени во болниците во Пакрац, Нова Градишка и Славонски Брод. Неофицијално се дознава и дека сите тројца загинати се хрватски државјани, додека меѓу повредените има и странци.

Истрагата е во тек, но според пишувањата на медиумите, патничкиот воз не застанал на сигналот за застанување, по што удрил во товарен воз кој бил запрен на пругата поради поправка.