Вкупно 23 лица се приведени во голема полициска операција Црна вратоврска против меѓународна група за трговија со дрога, како резултат на долготрајната истрага насочена кон „супер картелите“ кои контролираат голем дел од европските трговија со кокаин, потврди во вторникот Европол.
Како што беше потврдено во вторникот од МВР на Кантонот Сараево, кое оперативно ја водело акцијата, меѓу уапсените се двајца високи полициски функционери - Вахидин Муњиќ, актуелен директор на Полициската управа на МУП на Федерацијата Босна и Херцеговина и Мустафа Селмановиќ, командант на елитната специјална полициска единица.
Заедно со нив беа приведени и група луѓе од различни профили, од претприемачи до директор на болницата во Зеница, па дури и инфлуенсер.
„Европол ја поддржа вчерашната акција, која служи како уште една пресвртница во борбата против таканаречениот „супер картел“, сојуз на криминални мрежи кои контролираа голем дел од европската трговија со кокаин“, се вели во соопштението на Европол.
Оттаму додаваат дека во подготовките за оваа акција и нејзиното спроведување учествувале агенти на Американското Федерално биро за истраги (ФБИ) и Агенцијата за борба против дрогата (ДЕА), како и француската и белгиската полиција.
Главната цел на операцијата со кодно име „Црна вратоврска“, како што се наведува во соопштението на Европол, е лице кое и покрај апсењето во ноември 2022 година, продолжило да ја насочува трговијата со дрога од земјите во Јужна Америка, како Бразил, Колумбија и Перу, до Европа и Австралија од својата база во Дубаи.
Тоа лице, како што претходно објавија медиумите, всушност е државјанин на БиХ и Холандија, Един Гачанин, кој своите криминални активности ги вршел од Емиратите.
Од Европол објаснуваат дека тој, соработувајќи со други меѓународни трговци со дрога во Дубаи, инвестирал во шверц на тони кокаин и на тој начин станал моќна фигура која го контролира масовното снабдување со овој наркотик во Европа, како и во и производството на синтетички дроги на територијата на Унијата.
Се потсетува дека уште пред рацијата во понеделникот, полицијата во Босна и Херцеговина уапсила двајца осомничени и запленила 55 илјади евра во готовина, осум огнени оружја, 11 полициски радија и документи за перење пари. На денот на акцијата, органите на прогонот дополнително одзеле готовина, автомобили, лаптопи и одземени други докази.
Сите приведени се обвинети за тешки кривични дела како што се трговија со дрога од големи размери, перење пари и поврзан организиран криминал во Босна и Херцеговина.
Муњиќ и Селмановиќ се осомничени за злоупотреба на службената положба и овластување.
Медиумите тоа го поврзуваат со фактот дека во заштитата на Гачанин учествувале повеќе припадници на специјалната единица на МУП на Федерацијата БиХ, кога тој во 2016 година бил во БиХ, за што финансиски ја „наградил“ единицата со донирање униформи и опрема.
Директорот Муњиќ, наводно, незаконски дозволил компромитирани полицајци да останат во служба и покрај собраните докази против нив.
Целата афера има и политички импликации бидејќи еден од уапсените, бизнисменот Гордан Мемија е поврзан со актуелниот министер за надворешни работи на Босна и Херцеговина, Елмедин Конаковиќ.
