Сојузниот претседател на Република Австрија, Александар ван дер Белен, престојува во официјална дводневна посета на Албанија, каде што со државна церемонија беше пречекан од неговиот колега Бајрам Бегај.
Претседателот на Албанија, Бегај, со државна церемонија го прими австрискиот претседател во просториите на Претседателството на Албанија, додека на прес-конференција двајцата претседатели се фокусираа на прашањата за соработката меѓу двете земји, случувањата во регионот, евроинтеграциите и други прашања.
Бегај истакна дека Австрија е историски партнер и пријател на Албанија и на Албанците.
„Ние го споделивме заедничкиот став дека албанско-австриските односи доживуваат многу добра клима на соработка и разбирање и дека политичкиот дијалог меѓу двете земји е интензивиран, вклучително и размената на посети на високо ниво. Исто така, изразивме волја и подготвеност за интензивирање на оваа соработка. Во разговорот стана збор и за прашањето за европскиот пат на Албанија“, рече Бегај.
Тој нагласи дека Австрија одиграла важна активна улога во поддршката на европската перспектива на Албанија.
Во врска со руско-украинската војна, Бегај рече дека со претседателот Ван дер Белен ги потврдиле позициите на земјите за „осуда на оваа неиспровоцирана и неоправдана агресија против суверена земја и непоколеблива поддршка за украинскиот народ и нејзиниот територијален интегритет“.
За процесот на нормализирање на односите помеѓу Косово и Србија и преговорите меѓу нив, Бегај рече: „За нас Косово е од приоритетно значење. Ние сме целосно убедени дека дијалогот е единствен начин за решавање на проблемите меѓу Република Косово и Република Србија. Во никој случај, под никакви околности, како претседател на Република Албанија, не би прифатил во Косово да има една Република Српска.“
„Од суштинско значење за развојот на регионот е нормализацијата на односите меѓу Србија и Косово“ Австрискиот претседател истакна дека неговата посета е дел од многу долгата традиција на многу добри односи меѓу Австрија и Албанија.
Ван дер Белен рече дека со Бегај разговарал како понатаму да ја развијат соработката меѓу двете земји.
„Австрија, всушност, е препознаена во Албанија како многу голем поттикнувач во однос на процесот на пристапување на Албанија во ЕУ, но и на другите земји од Западен Балкан. Ние, всушност, уште еднаш го потврдуваме овој пристап земајќи ја предвид геополитичката ситуација во регионот. Имаме и многу добри резултати во последно време, особено отворањето на преговорите на Европската Унија со Албанија и Северна Македонија минатиот јули“, рече Ван дер Белен.
Во врска со руско-украинската војна, тој нагласи дека тие многу ја ценат позицијата на Албанија која „стои на страната на Украина и всушност беше примерна со прифаќањето на сите мерки на санкции наметнати од Европската Унија“.
„Убеден сум дека мора да застанеме заедно и солидарно на страната на независна Украина“, додаде австрискиот претседател.
Ван дер Белен рече дека нормализацијата на односите меѓу Србија и Косово е од суштинско значење за развојот на регионот.
„Мислам дека преговорите во Охрид би можеле да бидат камен-темелник во процесот на нормализирање на односите меѓу Косово и Србија. Дијалогот меѓу овие земји е секако многу тежок, но и двете страни се свесни дека без договор од двете страни, двете земји нема да имаат иднина кон Европската Унија“, додаде тој.
Претседателот на Австрија имаше и поздравен говор во Парламентот на Албанија и заедно со неговиот колега Бегај ќе учествува на економски форум со австриски бизнис-претставници во Албанија.
