Министерката за надворешни работи и дијаспора на Косово, Доника Гервала, денеска изјави дека во име на Владата на Косово, по консултации со партнерите и пријателите на Косово, испратила писмо до Советот на Европа во кое таа објави дека Владата на Косово подготвува нацрт статут за Заедницата на општините со српскo мнозинство во Косово.
Министерот Гервала на прес-конференцијата истакна дека целта на Владата не е раздвојување, туку интегрирање на немнозинските заедници, како и примена на законите на Република Косово во сите косовски општини и елиминирање на надворешните влијанија.
„Нашата посвета во писмото упатено до Советот на Европа е сериозна и искрена посвета и повторување на понудата на премиерот Курти од 18 март 2023 година во Охрид, 2 мај 2023 година во Брисел, но и во последните неколку недели. Нацрт-документот на Владата на Косово би бил целосно во согласност со Уставот на Републиката“, нагласи Гервала.
Во писмото испратено до Советот на Европа, се наведува дека нацртот ќе биде испратен на оценка до Уставниот суд на Косово до крајот на мај.
Шефицата на косовската дипломатија рече дека не мисли оти писмото било предоцна.
„По денешното конкретизирање на нашата посветеност да направиме значаен и опиплив чекор во исполнувањето на нашите обврски, бараме и очекуваме Советот на Европа да го исполни својот дел од обврската и да го покани Косово без одлагање да се приклучи на Советот на Европа, како земја која не само што има многу услови за членство во оваа организација, која веќе ги исполни тие услови“, нагласи Гервала.
Претходно, заменик министерот за надворешни работи и дијаспора на Косово Крешник Ахмети соопшти дека на состанокот на Комитетот на министри на Советот на Европа, одржан во вторник на ниво на постојани претставници на земјите членки, препораката на Парламентарното собрание на Советот на Европа за прием на Косово не беше разгледан.
Тој рече дека новиот услов за испраќање на европскиот нацрт-статут за формирање на Заедницата до Уставниот суд го спречил прашањето за Косово да биде на дневен ред на министрите за надворешни работи.
Минатата недела косовскиот премиер Албин Курти изјави дека по условот за спроведување на пресудата на Уставниот суд на Косово за враќање на земјиштето на манастирот Високи Дечани, кој е исполнет, некои европски престолнини почнаа да ја условат и со ЗСО.
Тој одби, велејќи дека Косово ги исполнува сите услови и предуслови, што го констатира и Парламентарното собрание на Советот на Европа. Германија и Франција се двете земји кои го условија членството на Косово во Советот на Европа со конкретни чекори за формирање на Заедницата.
Коментирајќи го писмото од Владата на Косово, германската амбасада во Косово соопшти дека само испраќањето на нацрт-статутот на Заедницата до Уставниот суд на Косово се смета за конкретен чекор за негово формирање.
„Како што рече амбасадорот Рохде во својот твит по гласањето во Парламентарното собрание на Советот на Европа, Косово сега треба да преземе тешка работа. Тоа се уште не се случило“, се вели во одговорот на германската амбасада за косовските медиуми.
Во меѓувреме, Џералд Кнаус од Европската иницијатива за стабилност изјави дека и покрај испратеното писмо, не очекува Косово да се најде на дневен ред на Комитетот на министри на Советот на Европа на 17 мај. Тој смета дека писмото е испратено доцна.
