Ацо Мартиновиќ (45), кој вчера убил најмалку 12 лица, меѓу кои две деца на возраст од 10 и 13 години, како и две жени во црногорскиот град Цетиње, извршил самоубиство.
Обвинителката Андријана Настиќ доцна синоќа соопшти дека убиствата се извршени на пет локации и дека сторителот на овие злосторства се самоубил на шестата. Загинаа 12 лица, а 13-от е извршител на убиствата, јавува РТЦГ.
Како што потсети таа, вчера околу 18 часот, дежурниот обвинител во Вишото државно обвинителство во Подгорица бил известен дека во Цетиње било употребено огнено оружје и дека се убиени неколку лица.
„На секоја локација беше спроведена истрага и беа обезбедени докази кои ќе бидат земени во предвид. Сторителот на убиствата се самоуби и ова е шеста локација каде се спроведува истрагата. Во тек се обвинителски и полициски дејствија кои ќе расветлат за околностите под кои се случил овој настан“, рече Настиќ.
Како што нагласи таа, на првата локација во кафаната биле убиени четворица мажи, на втората исто така четворица, а на третата две деца. На четвртата едно лице е убиено, а на петтата уште едно лице. Самоубиството било извршено на шеста локација.
Мартиновиќ, кој бил во бегство, полицијата го лоцирала недалеку од неговата куќа во Цетиње.
„Откако полицијата го опколи и откако виде дека е во безизлезна ситуација, тој се застрела и почина при транспортот до клиничкиот центар“, изјави на прес-конференција директорот на полицијата Лазар Шќепановиќ.
Министерот за внатрешни работи Данило Шарановиќ синоќа на прес-конференција рече дека осомничен за убиствата е Ацо Мартиновиќ.
Во престрелката се ранети уште четири лица, на кои им е укажана лекарска помош во Клиничкиот центар на Црна Гора во Подгорица.
Тој посочи дека не е познат мотивот за повеќекратните убиства, а дека жртвите биле негови пријатели, роднини и кумови.
Како што дознава порталот РТЦГ, Мартиновиќ бил во конфликт со Д.К. со кого се сретнал во кафулето „Велестово“. Потоа отишол дома да земе пиштол, се вратил во кафулето и убил и ранил неколку лица. После тоа се упатил кон Хумчи, каде ги убил децата и сопругата на сопственикот на кафеаната.
По повод трагедијата во Цетиње, Владата на Црна Гора прогласи денови на жалост на 2, 3 и 4 јануари.
Претседателот на Црна Гора Јаков Милатовиќ изјави дека е потресен од трагедијата во Цетиње и изрази сочувство до семејствата и пријателите на загинатите во масакрот.
„Наместо празнична радост, над нашиот главен град и цела Црна Гора надвисна тага поради загубата на невини животи. Шокиран сум и потресен од оваа трагедија што го поцрни нашето Цетиње, семејствата и пријателите на загинатите, на кои им изразувам искрено сочувство“, изјави Милатовиќ на официјалниот Х профил.
„Се молиме и се надеваме на оздравување на сите ранети. Нашите мисли вечерва се со семејствата кои ги загубија своите најблиски и граѓаните на Цетиње. Цела Црна Гора ја чувствува и ја споделува вашата болка“, додаде тој.
Многу лидери и претставници од регионот изразија сочувство до црногорскиот претседател и семејствата на жртвите.
Медиумите објавија дека Мартиновиќ пред две години бил уапсен поради поседување оружје и закани, но не се знае каква казна му е изречена.
Ова е втор ваков крвав инцидент во Цетиње, откако во август 2022 година беа убиени 11 лица, меѓу кои и две деца. Тогаш Вук Бориловиќ од Цетиње по случаен избор пукал во своите сограѓани, по што и тој бил убиен.
