Српскиот премиер во заминување Милош Вучевиќ во петокот изјави дека евентуалното повлекување на САД од КФОР на Косово може да доведе до влошување на безбедносната ситуација.
Одговарајќи на прашања на новинарите за време на неговата посета на Сараево, Вучевиќ ги коментираше написите на германските медиуми дека САД ќе се повлечат од базата Бондстил на Косово и што тоа би значело за Приштина.
Според него, дали САД ќе се повлечат од КФОР зависи од одлуката на претседателот Доналд Трамп и неговата администрација. Тој нагласи дека Србија ќе ја следи ситуацијата.
„Ова може да им наштети на безбедносните услови на Косово и Метохија. И сето ова што се случува на геополитички план, како во однос на Украина, така и во однос на односите меѓу партнерите во НАТО, сѐ се преклопува“, рече Вучевиќ по средбата со митрополитот дабробосански Хризостом.
Тој нагласи дека според Кумановскиот договор, КФОР е одговорен за безбедноста на сите граѓани на Косово, особено кога станува збор за српската заедница, нагласувајќи дека е апсолутно неприфатливо косовските сили да го заменат КФОР во српските области.
Вучевиќ на вториот ден од посетата ја посети Дабробосанската митрополија во Сараево и се сретна со митрополитот Хризостом.
„Сигурно ќе продолжиме да и помагаме на митрополијата Дабробосанска, да помагаме и да ја штитиме српската заедница во Сараево, не голема, но значајна, секако помагајќи во понатамошниот развој на Источно Сараево како центар на Србите во овој дел на Босна и Херцеговина, односно Република Српска“, рече Вучевиќ.
На новинарско прашање за судскиот спор против претседателот на РС, Милорад Додик, Вучевиќ одговори дека би сакал и се моли на Бога некој да не се обиде да ја злоупотреби судската моќ за да ја поништи изборната волја на граѓаните.
„Правосудството не смее да им го одземе суверенитетот на граѓаните кои одлучуваат во демократските општества на избори, бидејќи тогаш тоа ќе ја направи бесмислена правно регулирана држава. Сите мора да бидат еднакви пред законот, секој може да одговара пред судовите и нема привилегирани или заштитени луѓе, но се плашам дека има политички судења“, тврди Вучевиќ.
