Српскиот претседател Александар Вучиќ вечерва по пристигнувањето во Бања Лука соопшти дека со пресудата против Милорад Додик, претседателот на ентитетот на Босна и Херцеговина, Република Српска, е нападната РС и ова е тежок ден за српскиот народ“.
Како што истакна, каква и да е одлуката на РС, Србија и тој лично секогаш ќе стои зад неа.
Обраќајќи им се на насобраните симпатизери на СНСД кои го чекаа него и Додик пред Палатата на Републиката во Бања Лука, Вучиќ рече дека „советниците му рекле дека не е најдобро време да отпатува таму“.
„Моментот не е поволен, не е радосен, но ако можев да бидам тука пред неколку дена кога го славевме нашиот празник - Сретење, кога се радувавме, ќе беше штета да не сум тука кога е тешко“, рече претседателот на Србија.
Вучиќ истакна дека денеска е тежок ден за целиот српски народ.
Со Вучиќ во Бања Лука пристигна и министерот за финансии Синиша Мали.
Инаку, Вучиќ пристигна во Бања Лука на итна покана на Додик, откако Судот на Босна и Херцеговина го осуди претседателот на РС на една година затвор и шестгодишна забрана да ја извршува функцијата, како што се наведува, непочитување на одлуките на високиот претставник Кристијан Шмит.
Пред да дојде во Бања Лука Вучиќ присуствуваше на седницата на Советот за национална безбедност на Србија по повод последните случувања во БиХ.
Министерот за внатрешни работи Ивица Дачиќ вечерва изјави дека на седницата била изразена голема загриженост за ситуацијата во Република Српска по пресудата против Милорад Додик и било оценето дека ова е најголемата криза од крајот на војната.
По итната седница, тој на прес-конференција рече дека ова е резултат на генералниот напад на Сараево и некои западни сили врз РС и основните одредби од Дејтонскиот договор.
