Основното јавно обвинителство Скопје информираше дека е завршена истрагата против Љупчо Палевски Палчо, првоосомничениот за убиството на Вања Ѓорчевска и Панче Жежовски и оти побарале одложување на судскиот процес против четворицата помагачи на Палевски, чиј почеток е закажан за 30. јули во вторник.
„Надлежниот јавен обвинител од Основното јавно обвинителство Скопје достави известување за завршена истрага до првоосомничениот за двојното грабнување и свирепо убиство на 14-годишната Вања Ѓорчевска и на 74-годишниот Панче Жежовски. Со ова тече законскиот рок на одбраната да изврши увид во доказите. По истекот на овој рок и поднесување обвинение, јавниот обвинител ќе предложи спојување на судските постапки против вкупно петмина обвинети за овој кривично-правен настан, бидејќи постојат законските основи предвидени во член 28 од Законот за кривична постапка. Со цел да се овозможи единственост на постапката, обвинителството ќе побара одлагање на рочиштето закажано за 30-ти јули против четворицата претходно обвинети“, соопштија од ОЈО.
Според обвинителството, завршена е и истражната постапка за Стефан Димковски, кој го возел Палевски од Србија до Туркије, кој е осомничен за помагање по извршување на кривичното дело. Постапката против него ќе се води одвоено.
Основниот кривичен суд Скопје на 8 јули информираше дека го прифатил во целост обвинението против Влатко Кешишов, Велибор Манев, Боре Видевски и Александар Ѓорчевски обвинети за убиството на Ѓорчевска и Жежовски.
Кешишов, Манев и Видевски се товарат за кривични дела убиство и грабнување, додека Ѓорчевски, таткото на Вања се товари за кривично дело помагање при грабнување, бидејќи според обвинението, им дал упатства на киднаперите за времето кога девојчето ќе излезе само за да оди на училиште.
Според обвинението, Кешишов, Манев и Видевски заедно со осомничениот Палевски го планирале киднапирањето на Вања за да принудат член на нејзиното потесно семејство да даде пари за откупот, но зошто девојката е убиена не е прецизирано во обвинение.
Од Судот во меѓувреме информираа дека почетокот на судскиот процес е закажан за 30 јули, а Судија во случајот ќе биде Ивица Стефановски, кој е избран преку АКМИС системот.
