Аргентинските научници конструираа фотобиореактор кој ја искористува способноста на автохтоните микроалги да го отстрануваат јаглерод диоксидот од воздухот и да произведуваат кислород во урбаните области.
Експерти од Ј-TEЦ, организација основана од државната нафтена компанија ЈПФ и Националниот совет за научни и технички истражувања, работеа заедно со Институтот за истражување на биодиверзитетот и биотехнологијата за да развијат уред наречен Ј-AЛГAE, кој е 10 до 50 пати повеќе ефикасен од дрвото.
Научниците инсталираа два прототипа на фотобиореактор на бензинска пумпа во главниот град на Аргентина и индустриска фабрика на периферијата на Буенос Аирес.
Активната компонента на уредот се микроалги кои потекнуваат од југоисточната провинција Буенос Аирес, микроскопски организми кои ја користат енергијата на сончевата светлина (или вештачката светлина) преку фотосинтеза за да го претворат јаглерод диоксидот - стакленички гас кој е делумно одговорен за климатските промени - во кислород и биомаса.
„Микроалгите се микроорганизми кои се појавиле на Земјата пред приближно 3 милијарди години. Тие се првите оксигенски фотосинтетички организми кои ја развиле атмосферата каква што ја знаеме денес. И денес тие придонесуваат со 50 отсто од кислородот што го дишеме“, рече Марија Елена Онето, шеф на еколошката мисија на Ј-TEЦ.
Биомасата потоа може повторно да се користи во ѓубрива, биогорива и бетонски конструкции.
Секој уред може да фати околу половина метрички тон јаглерод диоксид годишно, рече Сара Медина, координатор на проектот.
„Нашите реактори во проектот Ј-AЛГAE се изградени за инсталација во урбани средини, на места кои се целосно асфалтирани, изменети од човековата активност, каде што не може да се засади едно дрво, а камоли повеќе. Значи велиме дека садиме дрво каде што може да се засади дрво, но каде што не е можно, имаме фотобиореактори“, вели Онето.
Оваа технологија доби значење во светот во последниве години како стратегија за ублажување на климатските промени. Проектот Ј-AЛГAE е прв од ваков вид во Аргентина.
