Хрватската влада во петокот донесе одлука за ограничување на цените на 70 производи, во екот на вториот граѓански бојкот на продавниците во текот на неделава.
Одлуката за директни мерки за контрола на малопродажните цени, која ќе стапи на сила од 7 февруари, има за цел да ги заштити граѓаните од високите цени во продавниците, тврдат од Владата.
„Сметаме дека одлуката е добра, дека производите се погодени и дека им се помага на најранливите“, рече премиерот Андреј Пленковиќ.
Со одлуката се оставаат непроменети цените на 30 производи ограничени во септември 2023 година, а се додаваат уште 40 производи. Највисоките цени за првата група важат за сите производи, без разлика на производителот.
„За новите 40 производи, трговците на мало се обврзани да обезбедат најмалку еден вид артикал од иста категорија на производи по највисока поставена цена. Кога одреден производ е исцрпен, трговецот на мало е должен да вклучи друг по ограничена цена“, се наведува во владината одлука.
Килограм неспакуван пченичен леб ќе чини до 1,50 евра, сончогледово масло 1,72 евра за литар, УХТ млеко со 2,8 отсто млечна маст 1,03 евра, бел гранулиран шеќер до 1,33 евра, брашно тип Т-550 мазно до 0,80 евра за килограм .
Цените на килограм пакувано мелено свинско месо (4,11 евра), цело пиле (3,32 евра) и јогурт во шише од 180 до 200 грама (0,49 евра) исто така се ограничени.
Цената на белиот ориз со долго зрно е ограничена на 2,29 евра за килограм, шпагети од 500 грама 1,09, 10 свежи јајца, класа М, 2,45 евра.
Гравот ќе се продава за најмногу 1,99 евра. Јаболко во пакување од два килограми ќе чини 2,19 евра. Млечната чоколада во пакување од 80 до 100 грама ќе чини најмногу 1,29 евра.
Бојкотот на продавниците поради постојаниот раст на цените во Хрватска првпат беше одржан на 24 јануари и резултираше со намалување од 53 отсто на вкупниот износ на издадените фактури тој ден.
Од вчера започна новата кампања на платформата „Ало, инспекторе“, со која се повикуваат граѓаните да не пазарат во три меѓународни трговски синџири една недела. Истовремено се бојкотира и набавката на три прескапи производи: газирани пијалоци, вода и детергент - во сите продавници.
И по новиот, втор последователен бојкот на купување производи во супермаркетите во Хрватска овој петок, притисокот од граѓаните за намалување на цените на стоките покажува резултати.
Така, по вчерашната најава на еден малопродажен синџир денеска и друг најави намалување на редовните цени за повеќе од илјада производи кои ќе бидат пуштени во продажба од 5-ти февруари годинава. Како што наведуваат во соопштението, ланецот секоја недела на своите клиенти им обезбедува повеќе од 1.800 производи по промотивни цени.
Дополнително, по трет пат во една година, почнувајќи од 5-ти февруари годинава, попусти на повеќе од 1.000 производи кои повторно ќе им бидат достапни на клиентите по намалени редовни цени. Ваквите попусти, како што наведоа, се дел од нивните постојани напори основните намирници и производи по поприфатливи цени да бидат што подостапни за граѓаните.
Јосип Келемен од платформата „Ало инспектори“ истакна дека со новиот бојкот граѓаните сакаат да испратат силна порака до сите кои не постапиле за сузбивање на поскапувањата и инфлацијата.
Бојкотот е проширен во сите сектори, вклучувајќи продавници, фризерски салони, ресторани и бензински пумпи, бидејќи граѓаните сметаат дека цените се вештачки покачени.
Тој тврди дека малопродажните синџири се обвинети дека учествувале во создавање ненормални поскапувања и дека цените на лековите и додатоците во исхраната се зголемени и до 60 отсто.
Маја Боговиќ од Хрватската стопанска комора истакна дека трговците само ги копираат цените на добавувачите, а Тајана Радиќ од Хрватската земјоделска комора предупредува дека неконтролираниот увоз ги загрозува домашните производители.
