Хрватскиот фудбалски стручњак Нико Ковач и официјално беше претставен за нов тренер на германскиот гигант Борусија Дортмунд.
Новиот тренер на бундеслигашот вети: „Сакаме да ја вратиме Борусија Дортмунд каде што припаѓа, а тоа е на врвот“.
Првата групна тренинг сесија со целосниот прв тим во вторникот беше фокусирана на напаѓачки акции и процеси.
„Имаше смеа и многу позитивност“, рече спортскиот директор Себастијан Кел, опишувајќи ги своите впечатоци и објаснувајќи: „Го чувствувам жарот во Ники и неговиот тренерски тим. Тој бара јасни принципи. Тоа е огромна можност за сите нас да направиме чекор напред во овој момент“.
Тој додаде дека гледаат голем потенцијал за оваа сезона.
„Мојот прв впечаток е многу позитивен. Воодушевен сум“, изјави Ковач.
За неговите први впечатоци од тимот рече дека го има потребниот квалитет.
„Имаме многу добри играчи. Многу зависи од самодовербата. Тимот во последните три натпревари беше одличен. Момците видоа колку е убаво да се победува. Победнички игри, остри додавања, имавме добра сесија денес“, додаде тој.
