Од играње бинго и одгледување коњи и гулаби, преку мечување и свирење на тапани до риболов. Вака големите светски спортски ѕвезди го трошат слободното време. Навивачите ги знаат по нивните способности на терените и ретко кој би ги замислил во вакво издание, но сепак тие имаат свој начин на полнење на батериите по напорните натпревари. Во прилог се седум спортски ѕвезди со интересно хоби.
Роналдо игра бинго
Многумина го сметаат за најдобар фудбалер на светот. Добитник е на Златната топка и е докажан фудбалски мајстор. Но сепак, надвор од терените, Кристијано Роналдо најдобро се релаксира играјќи бинго. Има изјавено дека игра бинго уште од времето кога првпат настапувал за Манчестер Јунајтед. Роналдо тврди дека оваа игра му помогнала подобро да го совлада англискиот јазик, но и дека за него е многу возбудлива.
Јокиќ одгледува коњи
Српскиот кошаркар Никола Јокиќ беше прогласен за најкорисен играч на минатата сезона (МВП ) во НБА лигата. Но наградата му беше доделена на невообичаен начин. Играчот на Денвер Нагетс го доби признанието во неговата штала со коњи во Сомбор, Србија. Јокиќ со коњ беше доведен на прославата. Честопати кога е во Сомбор тој сам се грижи за хигиената во шталата. Планира отворање и на хиподром. Неколкупати учествувал и на трки со коњи.
Тапанарот Петр Чех
Поранешниот голман на Челзи и Арсенал Петр Чех има музички афинитети. Свирењето тапани е негово хоби. Неговите видеа на Јутјуб на кои удира на тапани имаат милионски прегледи. Дури признава дека во торбата секогаш носи палки бидејќи никогаш не знае кога ќе има прилика да се опушти. Почнал да свири кога имал 30 години.
Бекам мечува со Вил Смит и Том Круз
Дејвид Бекам е страстен љубител на мечувањето. Во вештините на овој спорт го внел актерот Том Круз. Заедно со нив вљубеник во мечувањето е уште една светска ѕвезда, Вил Смит. Тој всушност во изјава открил дека со Бекам тренираат во приватниот тренинг центар на Том Круз, место што го користат и за дружби.
Тајгер Вудс на подводен риболов
Најпознатиот голф играч има и хоби во кое ужива. Тој слободното време го поминува ловејќи риба. Сепак негова страст не е „обичниот” риболов туку подводниот. Односно Вудс практикува техника на ловење поголеми риби со стрела под вода.
Тајсон чува гулаби
Кој би рекол дека еден од најдобрите боксери на светот, поранешниот шампион во тешка категорија Мајк Тајсон има толку смирувачко хоби, а тоа е чувањето гулаби. Во ова задоволство тој го наоѓал мирот и додека беше активен во рингот, но и потоа. Тасјон честопати може да се види во неговиот гулабарник.
Печурките на Чави
Печурките го интересираат поранешниот играч на Барселона и на шпанската репрезентација, Чави. Неговите пријатели и дел од поранешните тренери велат дека е опседнат со микологија односно со печурките. Пеп Гвардиола неодамна изјави дека тој што одгледува печурки не може да е лошо момче.
