Кошаркарската репрезентација на Македонија во Сосновиец забележа убедлива победа над еден од домаќините на следното Европско првенство, Полска, со 71-96. Македонија до победата беше предводена од фантастичниот Ненад Димитријевиќ, но одлични беа и Итан Хап, Маслинко и Ѓуровски, кои завршија со двоцифрен ефект.
Домашните имаа водство само на почетокот од мечот, кога имаа предност од 14-8, но Македонија врати со серија од 0-13 и до крајот на натпреварот оваа предност не ја испуштивме. На првата мини-пауза заминавме со предност од највисоки +9 во тој момент, но и во вториот период предноста растеше. Брзо дојдовме и до двоцифрена предност и највисоки +13, но сепак, на полувремето се замина со наше водство од 38-47.
Вистинска експлозија на нашите кошаркари следуваше во третата четвртина која ја добивме со 22-12, а во еден момент имавме предност и од 69-46, пред домашните да намалат на 50-69 на крајот од третиот период. На почетокот од последната четвртина домашните со серија од 7-0 намалија на 12 поени разлика, но Македонија продолжи со одличната игра и брзо ја вративме предноста од над 20 поени разлика. Во финишот дојдовме и до највисоките +25, 71-96, што на крајот се покажа и како конечен резултат на овој натпревар.
Ненад Димитријевиќ беше вистински лидер на нашата репрезентација со 32 поени. Американското засилување, Итан Хап, мечот го заврши со 19 поени, а Стојан Ѓуроски уфрли 17. Двоцифрен заврши и Андреј Маслинко, кој постигна 10 поени.
Квалификациите за Европското првенство продолжуваат во ноември оваа година, кога Македонија двапати ќе игра против Литванија, прво дома, а потоа и на гости.
По извонредниот резултат во Полска нашите репрезентативци може да жалат за поразот на стартот од квалификациите од Естонија во СРЦ „Кале“ со 69-74.
Иако првото полувреме го одигравме одлично и на паузата заминавме со предност од +7 поени, сепак лошата трета четвртина, но и повредата на Ненад Димитријевиќ во последниот период, беа клучни за поразот на избраниците на селекторот Алекс Јончевски.
КВАЛИФИКАЦИИ ЗА ЕВРОБАСКЕТ 2025
ГРУПА „Х“
РЕЗУЛТАТИ 2. КОЛО
Полска – МАКЕДОНИЈА 71:96
Естонија – Литванија 65:59
ТАБЕЛА
1. Естонија 2 2 0 139:128 4
2.МАКЕДОНИЈА 2 1 1 165:145 3
3.Литванија 2 1 1 142:129 3
4.Полска 2 0 2 135:179 2
ИДНО КОЛО (21.НОЕМВРИ)
Македонија – Литванија
Полска - Естонија
