Синоќа во јужноамериканските квалификации за СП 2026 година, Парагвај со 2:1 победи против Аргентина, која и покрај поразот остана прва на табелата, а Бразил ремизираше 1:1 со Венецуела.
Аргентина поведе во Асунсион во 11. минута од натпреварот, а погоди напаѓачот на Интер Лаутаро Мартинез. НоПарагвајците, кои се борат за едно од шесте квалификациски места, брзо израмнија со голот на Тони Санабрија во 19. минута.
Победничкиот гол за Парагвај по одморот го постигна дефанзивецот на Хетафе Омар Алдерете со глава во 47. минута. За Парагвајците тоа беше прва победа на домашен терен против Аргентина по 15 години.
По 11 кола, Аргентина има 22 бода, три повеќе од Колумбија која има натпревар помалку и пет повеќе од Бразил.
Аргентинците во вторник гостуваат кај Перу, додека Парагвај, моментално шести со 16 бода, патува во Боливија.
Петкратниот светски шампион Бразил одигра нерешено во Венецуела, откако играчот на Реал Мадрид Винисиус Јуниор промаши пенал за победа.
Бразил мораше да се задоволи со бод, а единствениот гол за Селекао го постигна играчот на Барселона Рафиња од слободен удар.
Венецуела, која израмни преку Теласко Сеговија, по ремито е на седмото место со 12 бода. Бразил остана трет на табелата со 17 бодови.
Еквадор е петти откако Гонзало Плата постигна два гола во победата од 4:0 против Боливија во Гвајакил.
Ветеранот Енер Валенсија го постигна првиот гол на натпреварот од пенал во 26. минута, потоа двапати погоди Плата во 28. и 49. минута, а Алан Минда ја запечати победата на Еквадор со гол во 61. минута.
Во сабота се играат натпреварите Перу - Чиле и Уругвај - Колумбија.
