Турскиот претседател Реџеп Таип Ердоган во петокот се сретна со неговиот азербејџански колега Илхам Алиев во главниот град на Казахстан, Астана, со кого разговараше за билатералните односи, регионалните и глобалните прашања, како и за тековниот конфликт меѓу Израел и Палестина, соопшти Дирекцијата за комуникации на Туркије.
Ердоган рече дека Туркије ќе продолжи да ги зголемува напорите за хуманитарна помош и ја истакна потребата меѓународната заедница да испрати силни пораки за да се осигура дека Израел го почитува меѓународното право.
„Трајниот мир во регионот може да се постигне само по формирањето на географски интегрирана и независна држава Палестина во границите од 1967 година, со источен Ал-Кудс (Ерусалим) како главен град“, додаде турскиот лидер.
На средбата се разговарало и за процесот на нормализација на односите меѓу Туркије и Ерменија, како и за актуелната ситуација во однос на постконфликтниот процес меѓу Азербејџан и Ерменија.
Турскиот претседател престојува во Астана, каде што присуствува на самитот на Организацијата на туркиски држави (ОТС).
Организацијата на туркиските држави, порано позната како Туркиски совет, е меѓународна организација која се состои од независни туркиски земји кои работат заедно за зајакнување на меѓусебните односи.
Нејзини членки се Туркије, Азербејџан, Казахстан, Киргистан и Узбекистан, додека Унгарија, Туркменистан и Турската Република Северен Кипар имаат статус на набљудувач.
