Турскиот претседател Реџеп Таип Ердоган денеска изјави дека само Туркије може да ја спаси Европската унија од ќор-сокакот во кој западна, од економија до одбрана и од политика до меѓународен престиж.
Коментирајќи ги неодамнешните избори во неколку европски земји и подемот на екстремната десница, Ердоган рече дека либералната демократија, „најатрактивната идеологија“ на минатиот век, влезе во сериозна криза и дека вакуумот на демократијата го пополнуваат екстремно десничарските демагози.
„Ксенофобичните и исламофобични движења се во пораст во западните земји, особено во Европа. Екстремно десничарските демагози ја пополнуваат празнината во европските демократии, а либералната демократија ја загуби својата ефикасност“, рече турскиот претседател.
Тој, исто така, рече дека Туркије може да обезбеди „спас“ за брзото стареење на европската економија и демографската структура.
Турскиот претседател во оваа прилика укажа и на израелскиот геноцид на палестинските територии.
„Западот зазеде лицемерен став за хуманитарната криза во Газа. Туркије е единствената земја која може да ја спаси Европа од ќор-сокакот на ЕУ. Случувањата во Сирија и Украина уште еднаш докажуваат дека на Европа ѝ е потребна Туркије. Полноправното членство на Туркије во ЕУ може да ги реши сите овие прашања“, рече Ердоган.
Тој потенцираше дека западните организации и лидери, кои го гледаа масакрот на повеќе од 61.000 цивили, главно жени и деца, паднаа на тестот на човештвото во Газа.
Турскиот претседател изјави дека Анкара ја поздравува намерата на американскиот претседател Доналд Трамп да ја реши руско-украинската војна преку разговори, изразувајќи ја подготвеноста на Туркије да го поддржи патот кон траен мир, вклучително и да биде домаќин на разговорите.
„Пристапот за завршување на војната на преговарачката маса е во согласност со политиката што Туркије ја спроведува во изминатите четири години“, рече Ердоган по состанокот на владата во главниот град Анкара.
Тој нагласи дека Туркије сака да стави крај на војната, која ги чинеше животите на стотици илјади луѓе и за која и Русија и Украина платија висока цена.
