Туркије и Латвија ќе ја зајакнат соработката во одбранбената индустрија, изјави денес турскиот министер за надворешни работи Хакан Фидан.
„Ќе ја зајакнеме нашата соработка на ова поле со конкретни проекти“, рече Фидан на заедничката прес-конференција со неговата латвиска колешка Баиба Бразе во Анкара.
Изразувајќи ја благодарноста на Анкара за поддршката на Рига за процесот на пристапување на Туркије во Европската Унија, Фидан рече дека членството во 27-члениот блок е „стратешка цел“ за Туркије.
Истакнувајќи дека Туркије има политичка волја да ги развива односите со ЕУ на „конструктивен“ и на начин „ориентиран кон резултати“, тој го нагласи очекувањето Унијата да покаже јасен став.
Во врска со борбата против тероризмот, Фидан рече: „Особено во борбата против ФЕТО (терористичката организација), би сакал уште еднаш да го изразам нашето очекување за посилна соработка и преземање конкретни чекори.“
Тој ја истакна решеноста на Туркије „одлучно“ да ја продолжи својата борба против терористичката организација одговорна за обидот за пуч во Туркије во 2016 година.
Фидан повика и на прекин на израелската војна во Газа и Либан. „Израел, убивајќи цивили, не може да постигне мир и безбедност“, истакна Фидан, додавајќи дека меѓународната заедница мора да ги поддржи палестинските напори за основање сопствена држава на сопствената територија, за воспоставување мир во Израел и на целиот Блиски Исток.
