Туркије го прогласи утрешниот ден- 22 јануари за ден на национална жалост, по пожарот што избувна во хотел во ски-центарот Карталкаја во провинцијата Болу во северна Туркије, во кој животот го загубија најмалку 66 лица, изјави во вторник претседателот Реџеп Таип Ердоган.
Од 51 повредено лице, едно е во критична состојба и моментално е згрижено на одделението за интензивна нега.
„Нашите знамиња ќе бидат на половина копје во земјата и во нашите странски мисии до зајдисонце во среда, 22 јануари 2025 година“, рече Ердоган по состанокот на владата во Анкара.
Зборувајќи за Сирија, Ердоган го повика арапскиот и исламскиот свет „пред другите“ да го поддржат закрепнувањето на Сирија и западните земји да ги укинат санкциите наметнати на оваа земја разурната од војна.
Говорејќи за прекинот на огнот во Газа, Ердоган рече дека сликите од размената на затвореници покажуваат кој го цени човечкото достоинство, а кој го игнорира, додека го критикуваше Израел.
„Нашите браќа и сестри во Газа платија висока цена, но тие не потклекнаа на насилството и не се предадоа на политиката на масакр“, додаде Ердоган.
„Туркије ќе ги забрза своите напори да го отвори патот за траен мир во регионот, користејќи го прекинот на огнот во Газа како можност“, заклучи Ердоган.
