Германските истражители тргнуваат од исламистички мотив зад нападот со автомобил во Минхен, во кој вчера беа повредени 36 лица и за кој е осомничен Авганистанец.
„Осомничениот признал дека со својот автомобил намерно влетал во поворката. Откако го извршил делото, тој извикал „Алаху Акбар“ и почнал да се моли на местото на нападот. Сите негови изјави укажуваат на исламистичка позадина на нападот“, изјави високиот државен обвинител Габриеле Тилман на прес-конференција во Минхен.
Таа објасни дека истрагата сѐ уште е во рана фаза, но дека е можно да се зборува за исламистички мотив на сторителот.
На неговиот мобилен телефон биле пронајдени и комуникации кои укажуваат на исламистичките погледи на светот на осомничениот Фархад Н., 24-годишен Авганистанец.
Во моментов нема докази за каква било поврзаност со некоја исламистичка мрежа.
Државното правобранителство покрена обвинение за обид за убиство во 36 случаи против Авганистанецот, чие барање за азил беше одбиено пред неколку години, но му беше дозволено да остане во Германија од хуманитарни причини.
Според полицијата, Фархад Н. легално престојувал во Германија и работел во безбедносниот сектор.
Меѓу тешко повредените во поворката на членови на синдикат кои протестирале, а во која удри автомобилот е и двегодишно дете.
Во моментов во Минхен се одржува безбедносна конференција, па со денови е зголемено полициското присуство, особено во центарот на градот каде се случи нападот.
Вчерашниот напад дополнително ја засили дебатата за миграцијата за време на актуелната изборна кампања за предвремените парламентарни избори што ќе се одржат на 23 февруари.
