Американскиот државен секретар Ентони Блинкен вчера изјави дека израелскиот премиер Бенјамин Нетанјаху го прифатил новиот „предлог за премостување“ за договор за прекин на огнот и размена на заробеници во Газа, но од Хамас истакнуваат дека всушност предлогот „ги исполнува условите на Нетанјаху“ и е во согласност со неговата агенда.
Обраќајќи им се на новинарите во Тел Авив, Блинкен рече дека „предлогот за премостување“ што Нетанјаху го прифатил „го одразува тоа што е во договорот за прекин на огнот што американскиот претседател Џо Бајден го претстави на 31 мај“.
„Сега на Хамас останува да го стори тоа, а потоа страните, со помош на посредници од САД, Египет и Катар, ќе се собрат и ќе го завршат процесот на постигнување јасни разбирања за тоа како ќе ги имплементираат обврските што ги презеле според овој договор“, додаде Блинкен.
Шефот на американската дипломатија рече дека Нетанјаху е посветен на праќање израелски тим во Доха или Египет за да се обиде „да го заврши овој процес“.
САД, Египет и Катар минатата недела по разговорите за прекин на огнот во Доха објавија дека им предложиле на Израел и на Хамас, како што го нарекоа, „предлог за премостување“ за понатамошно намалување на „преостанатите празнини на начин што овозможува брза имплементација на договорот“.
Од друга страна, палестинската група Хамас во неделата соопшти дека новиот предлог ги исполнува „условите на Нетанјаху и е во согласност со нив, особено неговото отфрлање на траен мир, целосно повлекување од Појасот Газа и неговото инсистирање на продолжување на окупацијата на раскрсницата Нецарим (која го дели северот и југот на Појасот Газа), преминот Рафах и коридорот Филаделфија (на југ)“.
„Нетанјаху постави и нови услови во делот за размена на заложници и воведе други услови, што го попречува завршувањето на работата“, се вели во соопштението на Хамас.
Од Хамас ја истакнуваат својата посветеност на она што е договорено на 2 јули.
Бајден во мај рече дека Израел претставил трифазен договор со кој ќе се стави крај на непријателствата во Газа и ќе се обезбеди ослободување на заложниците што се држат во крајбрежната енклава. Во планот е вклучено прекин на огнот, размена на заложници и затвореници и реконструкција на Газа.
Министерството за здравство во Газа соопшти дека бројот на загинати Палестинци во нападите на израелската армија врз Појасот Газа од 7 октомври 2023 година се зголеми на 40.139.
Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од еден милион раселени Палестинци побараа засолниште од војната пред тој да биде нападнат на 6 мај.
И покрај тоа, израелските напади врз Појасот Газа продолжуваат со несмален интензитет, а испораката на хуманитарна помош не е доволна за решавање на хуманитарната катастрофа.
