Москва соопшти дека бројот на загинати во нападите врз верски објекти во Руската Република Дагестан се искачи на 19.
„Според прелиминарните податоци, убиени се 15 полицајци, како и четворица цивили, меѓу кои и еден православен свештеник“, се вели во соопштението на Истражниот комитет на Русија.
Властите ја продолжуваат истрагата започната синоќа за нападот, соопшти комитетот, додавајќи дека за време на судирите биле елиминирани пет милитанти.
Претходно во текот на денот, рускиот Национален антитерористички комитет (НАК) соопшти дека е донесена одлука за прекин на „контратерористичката операција“ воведена во регионот „во врска со елиминирање на заканите по животот и здравјето на граѓаните“.
„На 24 јуни 2024 година, во 8:15 часот (05:15 GMT), беше откажан правниот режим на антитерористичката операција во административните граници на Махачкала и Дербент, Република Дагестан“, соопшти понатаму НАК.
Во неделата, таа прогласи „режим за контратерористичка операција“ во градовите Махачкала, административната престолнина на Дагестан и Дербент по нападите од неидентификувани вооружени лица.
Цел на нападите биле полициски контролен пункт во Махачкала, како и две цркви и синагога во Дербент. Двата града се наоѓаат на околу 128 километри (79,5 милји) еден од друг.
Сергеј Меликов, шефот на Република Дагестан, во видео изјава на Телеграм рече дека во регионот е воведена тридневна национална жалост.
Во меѓувреме, шефот на руската Република Ингушетија, како и гувернерот на територијата Ставропол што се граничи со Дагестан, објавија дека се зајакнати безбедносните мерки во нивните региони.
Повеќе лидери од регионот, вклучително и претседателите на Кина, Азербејџан, Казахстан, Узбекистан и Таџикистан, испратија телеграми до рускиот претседател Владимир Путин, изразувајќи сочувство во врска со инцидентите.
