Два авиони Боинг 777 на холандската авиокомпанија КЛМ во неделата вечерта биле принудени да се вратат на аеродромот Шипхол во Амстердам поради технички проблеми, соопшти авиокомпанијата.
Во соопштението се наведува дека двата авиони слетале безбедно и дека нема повредени патници или членови на екипажот.
Боингот 777, кој полетал од Шипхол кон Бали во неделата, со планирано застанување во Сингапур, имал технички проблем додека бил над Германија, по што била донесена одлука да се врати во Амстердам, соопшти КЛМ.
Компанијата посочува дека претходно во неделата на летот за Шангај од Шипхол дошло до проблем со системот за вода за пиење за време на летот над Азербејџан, по што авионот се вратил во Амстердам.
Претходно, Боинг 737 на КЛМ во саботата принудно слета во Норвешка по проблем со моторот за време на летот, а нема повредени.
Норвешката полиција соопшти дека Боингот 737, кој летал од Осло за Амстердам, принудно слетал во јужна Норвешка по технички проблем што се случил веднаш по полетувањето.
Локалните медиуми јавија дека пилотите забележале како излегува чад од левиот мотор.
Поради тој инцидент, започна истрага за причините за откажувањето на авионот.
