Европската комисија денеска ја обвини Русија и нејзините претставници за „мешање без преседан“ за време на гласањето на референдумот за пристапување на Молдавија во ЕУ, тврдејќи дека целта била „дестабилизација на демократскиот процес“ на таа земја.
„Ова гласање се одржа со невидено мешање и заплашување од страна на Русија и нејзините претставници, со цел да се дестабилизираат демократските процеси во Република Молдавија“, рече портпаролот на Европската комисија Петер Стано на брифинг со новинарите во Брисел.
Тој додаде дека ЕУ почитува одредени принципи, вклучително и закони, но тврди дека „Русија, нејзините актери и нејзините полномошници не го почитуваат“.
„Ова е постојан напор на Русија и нејзините полномошници, не само во Молдавија, туку и против нашите земји, и тоа е долготрајна борба. Причината поради која може да изгледа дека понекогаш се успешни е тоа што немаат граници“, рече тој.
Пред гласањето, молдавските власти тврдеа дека бегалецот Илан Шор, кој живее во Русија, се обидел да се меша во гласањето на референдумот и на претседателските избори во Молдавија.
Од друга страна, портпаролот на Кремљ, Дмитриј Песков, изјави дека претседателката на Молдавија, Маја Санду, мора да презентира докази за нејзините тврдења дека Русија се мешала во изборите во таа земја, бидејќи тоа е сериозно обвинување.
Според последните резултати на Централната изборна комисија во Молдавија, по обработката на 98,42 отсто од гласачките материјали, повеќе од половина од гласачите во таа поранешна советска република гласале на референдумот за влез на земјата во Европската унија.
Иако првите извештаи на Централната изборна комисија (ЦИК) покажаа дека мнозинството граѓани гласаа против влезот во ЕУ, резултатите се свртеа по пребројувањето на 1.463.649 гласови, пренесува Moldovalive.md.
Референдумот за влез во ЕУ се одржа во недела, во исто време со изборите за претседател на Молдавија.
Според податоците на Централната изборна комисија, по обработката на 98,29 отсто од гласачките материјали, на изборите за претседател на државата води актуелната претседателка Маја Санду, која освоила 41,92 отсто од гласовите, додека на второто место е кандидатот на Социјалистичката партија Александар Стојаногло со 26, 35 отсто од гласовите.
