Турскиот претседател Реџеп Таип Ердоган денес побара Израел да престане со своите „агресивни акции“ врз соседна Сирија, каде што новата администрација ја презеде одговорноста по падот на режимот на Асад минатиот месец.
„Почнувајќи од Израел, силите што ги напаѓаат сириските територии мора веднаш да стават крај на своите агресивни дејства. Во спротивно, последиците ќе имаат негативно влијание врз сите“, рече Ердоган во своето обраќање на состанокот на пратеничката група на Партијата за правда и развој (АК Партија) во главниот град Анкара.
„Сите треба да се повлечат од регионот. Заедно со нашите сириски браќа за кратко време ќе ги уништиме главите на ДЕАШ, ЈПГ и на другите терористички организации“, додаде тој.
Изразувајќи силен став против ЈПГ, сирискиот огранок на терористичката организација ПКК, тој укажа на нејзината окупација на значителни делови од сириската територија.
„Терористичката организација ЈПГ, која ги ограбува природните ресурси на Сирија, не ќе може да ја избегне претстојната горчлива судбина доколку не се расформира и не го остави оружјето“, рече тој.
Новата сириска транзициска влада, предводена од Ахмед ал-Шара, се заложи за укинување на санкциите за да може да ја обнови земјата по речиси 14 години разорна граѓанска војна. Анкара вети дека ќе помогне во обновата на Сирија по Асад и побара меѓународна соработка.
Претседателот ја повтори посветеноста на Туркије да ги заштити своите курдски граѓани и да ја обезбеди нивната иднина.
„Ние сме следбеници и поддржувачи на решението на сите прашања на нашите курдски браќа, исто како и на сите други групи во Сирија. Ние сме гарант за безбедноста на Курдите.“
Ердоган ја идентификуваше ЈПГ како најзначајна закана во Сирија. „Во моментов, најсериозен проблем во Сирија е терористичката организација ЈПГ, која сè уште зазема речиси една третина од територијата на земјата“, рече тој.
„Им наложив на нашите релевантни колеги да направат напори за распуштање на сепаратистичката организација со големо внимание и на сеопфатен начин.“
Осврнувајќи се на тековниот конфликт во Газа, Ердоган рече: „Со воспоставувањето прекин на огнот во Газа, каде што геноцидот и масакрите траат веќе 15 месеци, ќе се создаде важна можност за траен мир и стабилност во целиот регион“, рече тој.
„Внимателно ги следиме преговорите за прекин на огнот помеѓу Израел и Хамас и се надеваме дека ќе добиеме позитивни вести што е можно поскоро.“
