Анкара ќе продолжи да ги поддржува територијалниот интегритет, стабилност и мир на Казахстан, изјави турскиот претседател Реџеп Таип Ердоган.
„Ќе продолжиме да ги поддржуваме стабилноста, мирот, суверенитетот и територијалниот интегритет на братскиот Казахстан, кој има длабока историска позадина и државно искуство“, рече Ердоган на заедничката прес-конференција со неговиот казахстански колега Касим-Жомарт Токаев во главниот град Астана.
Претседателите Ердоган и Токаев остварија тет-а-тет средба, после која следуваше и состанок помеѓу делегациите на двете земји, на кои разговараа за билатералните односи и меѓународните прашања.
Ердоган и Токаев, исто така, копретседаваа со четвртиот состанок на Советот за стратешка соработка на високо ниво Туркије-Казахстан за зајакнување на политичките, економските, културните и одбранбените врски.
Ердоган рече дека ги оцениле „одличните односи“ меѓу двете земји.
Тој додаде дека Анкара и Астана ќе продолжат да работат на зајакнување на врските во областа на транспортот, енергијата и трговијата.
„Минатата година го надминавме нивото од 5 милијарди долари во обемот на нашата трговија со Казахстан. Преземаме цврсти чекори кон нашата цел од 10 милијарди долари на среден рок“, рече претседателот Ердоган.
На Ердоган му беше доделен и Орден за пријателство од Токаев.
