Европскиот суд за човекови права денеска ја отфрли жалбата на романскиот кандидат за претседател на екстремната десница Калин Ѓорѓеску против одлуката на романскиот Уставен суд да го поништи гласањето на претседателските избори во 2024 година.
Судот со седиште во Стразбур го отфрли неговиот случај со образложение дека e „надвор од опсегот на примена на правилото 39“, што се однесува на случаите во кои судот може да издаде такви итни наредби.
Судот за човекови права не донел одлука за основаноста на случајот, пишува бриселскиот портал Политико.
Ѓорѓеску победи во првиот круг од изборите во Романија во ноември минатата година, но Уставниот суд на Романија го поништи гласањето пред да се одржи вториот круг, поради наводното руско мешање во изборите, според декласифицираните романски разузнавачки документи.
Уставниот суд утврдил и дека Ѓорѓеску ги прекршил правилата за финансирање на кампањата, бидејќи пријавил до изборната комисија дека не потрошил пари за тоа, а утврдено е дека неговата кампања е финансирана на ТикТок од извесен Богдан Пешчир во износ од еден милион евра.
Поради зголемената популарност на Ѓорѓеску на ТикТок Европската унија започна истрага за социјалната мрежа.
Тој поднесе жалба до Европскиот суд за човекови права, барајќи резултатите од првиот круг да се признаат како привремена мерка.
Романскиот Уставен суд претходно овој месец одби да ја поништи одлуката за поништување на првиот круг од изборите.
Новите избори ќе се одржат на 4 мај, а вториот круг е планиран за две недели подоцна, на 18 мај.
Ѓорѓеску најави дека повторно ќе се кандидира, истакнувајќи дека води во анкетите.
