Претседателката на Европската комисија Урсула фон дер Лајен пристигна во Киев за да и даде поддршка на Украина на третата годишнина од војната со Русија.
Таа беше придружувана од други европски претставници кои отпатуваа за Киев со воз. Делегацијата беше пречекана од Андриј Јермак, шеф на Кабинетот на претседателот на Украина и министерот за надворешни работи Андриј Сибиха.
„Денес сме во Киев, бидејќи Украина е Европа“, рече фон дер Лајен на X.
„Во оваа борба за опстанок, не е загрозена само судбината на Украина. Тоа е судбината на Европа“, додаде таа.
Фон дер Лајен треба да се сретне со претседателот Владимир Зеленски и тие ќе копретседаваат со состанокот меѓу Колеџот на комесари и украинската влада.
На состанокот ќе учествуваат вкупно 37 шефови на држави, од кои 13 ќе присуствуваат лично, а 24 ќе се приклучат виртуелно. Дискусиите ќе се фокусираат на стратегијата на Украина и различните формати на безбедносни гаранции.
Од понеделник наутро, во главниот град на Украина веќе пристигнаа канадскиот премиер Џастин Трудо, шпанскиот премиер Педро Санчез, литванскиот претседател Гитанас Науседа, летонскиот претседател Едгарс Ринкевичс и естонската премиерка Кристен Михал.
