Германскиот министер за одбрана Борис Писториус денеска го критикуваше пристапот на американскиот претседател Доналд Трамп кон можните мировни преговори меѓу Русија и Украина.
„Жално е што администрацијата на Трамп веќе јавно направи отстапки за Владимир Путин уште пред да започнат преговорите“, рече Писториус на маргините на Советот на НАТО во Брисел.
Според Писториус подобро би било само на преговарачка маса да се разговара за можното членство на Украина во НАТО или евентуалното губење на територија за земјата.
Вчера Трамп на својата платформа за социјални медиуми Truth Social објави дека разговарал со рускиот претседател Владимир Путин. Тој рече дека двајцата водачи се согласиле да започнат мировни преговори што е можно поскоро.
Германскиот министер за одбрана побара вклучување на Европа во можните мировни преговори бидејќи како што вели Европа ќе мора да живее со последиците од евентуалниот договор.
Тој, исто така, го критикуваше рускиот претседател Путин, велејќи:
„Путин постојано го провоцира Западот и не напаѓа на хибриден начин. Би било наивно да се верува дека оваа закана навистина ќе исчезне преку мировен договор кога и да дојде“, изјави Писториус.
Тој нагласи дека би сакал мировните преговори да се одржат порано.
Баербок: Европејците не реба да бидат изоставени
Во меѓувреме, германската министерка за надворешни работи Аналена Баербок исто така ги коментираше можните мировни преговори меѓу Русија и Украина.
„Не можеме да водиме разговори без да ја вклучиме Украина. Мирот во Европа е во прашање, затоа ние Европејците мора да бидеме вклучени“, изјави Баербок во интервју за радиото „Дојчландфунк“.
Шефицата на германската дипломатија додаде дека не била однапред информирана за телефонскиот разговор меѓу американскиот и рускиот лидер.
„Така функционира администрацијата на Трамп. Затоа треба да има постојана меѓусебна комуникација со различни актери“, рече Баербок.
