Германската надворешна разузнавачка служба БНД имала информации една недела пред руската паравоена група „Вагнер“ да организира бунт против Москва, јавуваат германските медиуми.
Германските радиодифузери ВДР и НДР во своите ексклузивни вести рекоа дека БНД била свесна за бунтот и дека имала „неизвесно навестување“ една недела пред тоа.
БНД контактирала со разузнавачките служби на своите сојузнички земји, но не можела да ја потврди информацијата, па канцеларот Олаф Шолц не бил веднаш информиран, наведуваат телевизиите.
Германската служба за надворешно разузнавање ја известила својата Влада само ноќта пред платениците од групата „Вагнер“ да ги нападнат градот Ростов и руските воени објекти, објавија радиодифузерите.
Германските разузнавачки служби, исто така, ја шпионирале дискусијата на шефот на паравоената група „Вагнер“, Евгениј Пригожин, со белорускиот претседател Александар Лукашенко, според овие медиуми, кои во своето ексклузивно известување ја критикувале БНД дека не ја информирала германската Влада навреме.
Бунтот на „Вагнер“
На 24 јуни групата „Вагнер“ ги обвини руските сили дека ги напаѓаат нејзините борци, преместувајќи ги од Украина во рускиот град Ростов на Дон.
Руските власти го нарекоа „вооружен бунт“ и поднесоа кривично дело, додека претседателот Владимир Путин го осуди како чин на „предавство“.
Веќе следниот ден водачот на „Вагнер“, Евгениј Пригожин, и неговите борци биле на 200 километри од Москва кога решиле да се повлечат за да избегнат насилство.
Белорускиот претседател Александар Лукашенко дејствуваше како посредник, велејќи дека се ангажирал со Пригожин за да им помогне на двете страни да дојдат до брзо решение.
