Глобалното население ќе достигне 8 милијарди луѓе во ноември годинава, а Индија се предвидува дека ќе ја надмине Кина како најнаселена земја во светот во 2023 година, покажува извештајот на Обединетите нациии (ОН).
„Последните проекции на Обединетите нации сугерираат дека глобалното население би можело да порасне на околу 8,5 милијарди во 2030 година, на 9,7 милијарди во 2050 година и 10,4 милијарди во 2100 година“, се вели во најновиот извештај на Одделот за економски и социјални прашања на ОН (UNDESA).
Намалувањето на нивото на смртност е меѓу причините за растот на населението, се наведува во извештајот, додавајќи дека на глобално ниво, очекуваниот животен век достигнал 72,8 години во 2019 година, што е зголемување за речиси девет години од 1990 година.
„Се предвидува дека Индија ќе ја надмине Кина како најнаселена земја во светот во 2023 година“, се вели во извештајот на ОН, додавајќи дека двата најнаселени региони во светот во 2022 година биле Источна и Југоисточна Азија, со 2,3 милијарди луѓе.
„Фокусот треба да биде на луѓето“
Фондот за население на ОН рече дека глобалните предизвици или грижи, вклучително и пандемијата и климатските промени, или се зголемиле или остануваат исти.
„Светот достигна особено мрачна пресвртница во мај“, се вели во извештајот, повикувајќи се на податоците дека повеќе од 100 милиони се насилно раселени ширум светот.
Фондот за население на ОН рече дека фокусот треба да биде на луѓето.
„Наместо броевите да функционираат за системите, направете ги системите да работат за бројките со промовирање на здравјето и благосостојбата на луѓето“, се додава.
Во пораката, генералниот секретар на ОН, Антонио Гутереш, исто така, рече дека фокусот треба да биде на „секој човек“.
„[Да се фокусираме] на заштитата на човековите права и способноста на сите поединци да прават информирани избори за тоа дали и кога да имаат деца“, напиша Гутереш на Твитер.
