Кина се надева дека духовниот лидер на Тибет, Далај Лама може да се „врати на вистинскиот пат“ и целосно да ги исправи своите политички предлози, соопшти денеска кинеското Министерство за надворешни работи.
Кина е отворена за разговори за иднината на Далај Лама доколку тој се откаже од својот став, кој подразбира поделба на Кина, изјави Гуо Џиакун, портпарол на Министерството за надворешни работи.
„Далај Лама треба отворено да признае дека Тибет и Тајван се неотуѓиви делови на Кина, чија единствена легална влада е Народна Република Кина“, нагласи Гуо, користејќи го официјалното име на земјата.
Тој го изјави ова на прес-конференција кога беше замолен да ја коментира смртта на постариот брат на Далај Лама, Ѓало Тондап, објави Ројтерс.
Тондуп, кој почина вчера во својот дом во Калимпонг, Индија, на 97-годишна возраст, претходно беше неофицијален пратеник на Далај Лама, кој избега од Тибет во 1959 година за Индија, по неуспешниот бунт против кинеската власт, но изрази желба да се врати во Тибет пред да умре.
Од 2010 година, Пекинг не одржува официјални разговори со претставници на Далај Лама, сметајќи го за опасен сепаратист.
Далај Лама се повлече во 2011 година како политички лидер на тибетската влада во егзил, која Пекинг не ја признава.
Официјалните разговори со неговите претставници оттогаш се прекинати.
Како што старее Далај Лама, прашањето за одредување на неговиот наследник исто така станува се поитно.
Кина инсистира на тоа дека ќе го избере неговиот наследник за духовен водач на Тибет.
Но Далај Лама вели дека ќе ги разјасни прашањата за сукцесијата, како и дали и каде ќе биде реинкарниран, во согласност со тибетското будистичко верување, околу неговиот 90-ти роденден во јули.
Новата книга на Далај Лама, која треба да биде објавена во март, се очекува да обезбеди рамка за иднината на Тибет, како што рече тој, дури и по неговото заминување.
