ОН изразија голема загриженост поради тековните непријателства во јужен Либан, при што заменик-генералниот секретар на Обединетите нации за мировни операции ја опишува ситуацијата како „ужасна“.
Жан-Пјер Лакроа на прес-конференција рече дека „УНИФИЛ останува на сите свои позиции и спроведува голем број активности“ за да го одржи своето присуство.
Истакна дека привремените сили на Обединетите нации во Либан (УНИФИЛ) во моментов работат под „многу предизвикувачки и тешки услови“
Според него нестабилното опкружување ги ограничило активностите на мисијата и пријави три одделни инциденти кои влијаеле врз мировниците на УНИФИЛ во вторникот, вклучувајќи судири, размена на оган и воздушни напади.
„Нивото на уништување и опустушување, раселување, загуби на животи е навистина ужасно“, рече тој, повикувајќи на итен прекин на непријателствата и ја нагласи важноста од почитување на меѓународното хуманитарно право за заштита на цивилите.
„Ја користам можноста од моите посети (на Израел и Либан) да ги потсетам сите страни на нивната обврска да ја заштитат безбедноста и сигурноста на мировниците“, рече Лакроа, признавајќи ја фрустрацијата поради повторливите напади.
Тој додаде дека „имаме дури и некои видеа кои укажуваат на...намера“, во врска со одредени напади врз мировниците.
Запрашан за извештаите за употребата на бел фосфор и касетна муниција од страна на Израел во Либан, Лакроа ги потврди извештаите и нагласи дека ова оружје не треба да се користи во услови каде што е потенцијално погодено цивилното население.
Тој го повтори апелот на ОН за почитување на меѓународното хуманитарно право и заштита на цивилите, додавајќи дека „за жал, она што го гледаме е дека овие повици не секогаш се слушаат“.
