Русија во средата соопшти дека министерот за надворешни работи Сергеј Лавров ќе престојува во дводневна посета на Туркије за да присуствува на овонеделниот дипломатски форум во Анталија.
„Лавров ќе ја посети Туркије на 1-2 март за да присуствува на Дипломатскиот форум во Анталија на покана на турскиот министер за надворешни работи Хакан Фидан. Планирано е Лавров да се сретне и со турскиот колега“, изјави портпаролката на Министерството за надворешни работи Марија Захарова на брифинг со новинарите во Москва.
Захарова рече дека двајцата дипломати ќе разговараат за меѓународни прашања, вклучително и за ситуацијата во Украина, Палестина и Јужен Кавказ, како и Сирија и Либија.
Таа рече дека на дневен ред ќе биде и соработката меѓу Туркије и Русија во областа на енергетиката, безбедноста, банкарството и туризмот.
Форумот за дипломатија во Анталија ќе се одржи во јужниот крајбрежен град од 1 до 3 март.
Главната тема на форумот е „Унапредување на дипломатијата во време на превирања“.
Најавено е присуство на претставници од над сто држави, меѓу кои над 20 шефови на држави и влади, 80 претставници на меѓународни организации и околу 4.000 гости, вклучително и студенти, а ќе се одржат повеќе од 50 сесии на различни теми.
