Актуелниот претседател на Венецуела Николас Мадуро е прогласен за победник на претседателските избори во таа земја одржани во неделата, објави претседателот на Венецуелскиот национален изборен совет (ЦНЕ), Елвис Аморосо.
Аморосо доцна во неделата објави дека се преброени 80 отсто од гласачките ливчиња и го прогласи Мадуро, кандидатот на Гран Поло Патриотико, победник на претседателските избори на кои учествува десет кандидати.
Според првичните резултати, Мадуро освоил 51,2 отсто од гласовите, со што ја обезбедил својата трета изборна победа.
Кандидатот на Обединетата демократска платформа (ПУД) на опозициската коалиција, Едмундо Гонзалес Урутија го освои второто место со 44,2 отсто од гласовите.
Аморосо рече дека деталните изборни резултати ќе бидат објавени на веб-страницата на ЦНЕ во наредните часови.
Утврдено е дека одѕивот на гласачите бил 59 отсто. Победничкиот кандидат ќе положи заклетва како претседател на 10 јануари 2025 година.
