Италијанската премиерка Џорџија Мелони рече дека сфатиле дека преголемата зависност од една земја е стратешка грешка. Мелони одржа говор на затворањето на 15. Амбасадорска конференција во Рим, чиј домаќин беше Министерството за надворешни работи на Италија.
„Сфативме дека преголемата зависност и откажувањето од некои вредности е стратешка грешка во однос на суверенитетот. Исто така ја увидовме и зависноста од Русија во енергетиката. Увидуваме и дека веројатно сме премногу зависни од Соединетите Американски Држави во смисла на безбедноста. Секако, свесни сме и дека не би било мудро да се поттикнува зависноста од Кина додека се ослободуваме од зависноста од Русија“, рече Мелони. Таа истакна и дека воената потрошувачка е неопходна за заштита на националните интереси. Осврнувајќи се на војната во Украина, Мелони рече дека само прогласување на мир не би било доволно.
„Доколку сакате да ги уверите двата актери да седнат на маса, прво правило е односот на силите на теренот. Без рамнотежа на силите, тоа не би бил мир туку окупација“, рече Мелони.
Напоменувајќи дека Европската унија (ЕУ), Обединетите нации (ОН) и НАТО се основите на италијанската надворешна политика, Мелони рече дека Италија, сепак, треба да ја игра водечката улога.
