Јужнoкорејската Канцеларијата за истраги за корупција на високи функционери (ЦИО) во петокот одлучи да го прекине извршувањето на налогот за апсење на отповиканиот претседател Јун Сук Јеол.
Одлуката уследи по петчасовниот судир меѓу заедничкиот истражен тим предводен од ЦИО и претседателските безбедносни сили, што ги спречи истражителите да го приведат Јун, објави „Јонхап њуз“.
Претседателската резиденција е во комплексот на Министерството за одбрана откако Јун беше избран во 2022 година.
Инспекторите констатирале дека денеска е невозможно да се продолжи со извршување на наредбата и тие го напуштиле комплексот.
„Ова е многу тешка ситуација за сите. Мандатот на тајната служба е сосема јасен, но во исто време знаат дека ова што го прават не е легално. Само се надевам дека нема да има насилство“, изјави Али Чун Ин-бум, командант на јужнокорејските специјални сили.
Налогот за апсење, издаден минатата недела, останува во сила до понеделник. Ако до тогаш не биде уапсен, ќе мора да биде издаден нов налог за апсење.
Во последните денови, стотици поддржувачи се собраа во близина на резиденцијата за да го спречат неговото апсење. Некои беа насилно отстранети од полицијата.
Тие и денеска беа пред претседателскиот комплекс, каде скандираа „Победивме!“.
Некои од неговите гласачи се убедени дека минатогодишните парламентарни избори, на кои опозицијата убедливо победи, биле наместени, на што алудирал и самиот Јун во својата објава кога прогласил вонредна состојба.
Изборната комисија и Врховниот суд го отфрлија тоа тврдење како неосновано.
Во меѓувреме, ривалските групи, исто така, организираа протести барајќи итно апсење на Јун.
Јун беше разрешен на 14 декември и сега го чека судењето во Уставниот суд за да се утврди дали ќе биде трајно разрешен или вратен на функцијата. Одлуката на судот може да потрае и до шест месеци.
Јун е првиот актуелен претседател во историјата на Јужна Кореја кој се соочи со обвиненија за бунт и предавство, заедно со забрана за патување.
Ова е и првпат по актуелниот претседател во Јужна Кореја да биде распишана потерница.
Во тој поглед, обвинителите во петокот ги обвинија началникот на Генералштабот на јужнокорејската армија, генерал Парк Ан-су и генерал-полковник Квак Џонг-кеун, шеф на командата за специјални војни, под обвинение за бунт и злоупотреба на моќта.
Двајцата команданти се меѓу неколкуте високи воени функционери приведени во врска со неуспешниот обид да се воведе вонредна состојба на 3 декември.
Јун го назначи Парк да ја надгледува операцијата за итни случаи.
Поранешниот министер за одбрана Ким Јонг-Хјун, кој исто така беше уапсен, е првиот функционер кој е обвинет во истрагата за вонредна состојба.
