Обединетите нации во понеделникот го осудија „неприфатливото“ ниво на насилство кое стана вообичаено против хуманитарните работници, со рекордни 280 убиени ширум светот во 2023 година, и предупредија дека војната на Израел со Хамас во Газа може да предизвика уште повеќе такви смртни случаи оваа година. „Нормализацијата на насилството врз хуманитарните работници и недостатокот на одговорност е неприфатливо, несовесно и крајно штетно за хуманитарните операции насекаде“, рече Џојс Мсуја, вршител на должноста директор на Канцеларијата на ОН за координација на хуманитарни прашања (OЦХA), во изјава за Светскиот ден на хуманитарната помош. „Со 280 загинати работници во 33 земји минатата година, 2023 година беше најсмртоносната година за глобалната хуманитарна заедница, што е зголемување за 137 отсто од 2022 година, кога загинаа 118 работници“, се вели во соопштението на OЦХA.
Канцеларијата се повика на Базата на податоци за безбедност на хуманитарните работници, која ги следи овие податоци од 1997 година.
ОН соопштија дека повеќе од половина од смртните случаи во 2023 година, или 163, биле хуманитарни работници убиени во Газа за време на првите три месеци од војната меѓу Израел и Хамас, главно во воздушни напади.
Јужен Судан, зафатен од граѓански судири, и Судан, каде што војната меѓу двата ривали беснее од април 2023 година, се следните најсмртоносни конфликти за хуманитарците, со 34, односно 25 смртни случаи. Исто така во првите 10 се Израел и Сирија, со по седум загинати; Етиопија и Украина, со по шест мртви; Сомалија со пет смртни случаи; и четири смртни случаи во Мјанмар и Демократска Република Конго. Во сите конфликти, повеќето од загинатите беа меѓу локалниот персонал. И покрај „невиден висок број“ на смртни случаи на хуманитарни работници во 2023 година, OЦХA рече дека 2024 година „може да биде на пат за уште посмртоносен исход“. До 9 август, 176 хуманитарни работници се убиени ширум светот, според Базата на податоци за безбедност на хуманитарните работници. Според OЦХA, од октомври лани, кога милитантите предводени од Хамас започнаа смртоносен напад врз Израел што ја предизвика војната, повеќе од 280 хуманитарни работници се убиени во Газа, повеќето од нив вработени во агенцијата на ОН за палестински бегалци (УНРВА). Во овој контекст, лидерите на неколку хуманитарни организации во понеделник треба да испратат писмо до земјите-членки на ОН во кое ќе ја повикаат меѓународната заедница „да ги запре нападите врз цивилите, да ги заштити сите хуманитарни работници и да ги повика сторителите на одговорност“. Секоја година, Обединетите нации го одбележуваат Светскиот ден на човештвото на 19 август, годишнината од нападот врз нивното седиште во Багдад во 2003 година. Во бомбашкиот напад загинаа 22 лица, меѓу кои и Серџо Виеира де Мело, специјалниот претставник на ОН за Ирак, а беа повредени околу 150 локални и странски хуманитарни работници.
