Портпаролот на Кремљ, Дмитриј Песков, денеска повтори дека распоредувањето на воен контингент од земјите на НАТО на територијата на Украина е неприфатливо.
„Сакам да ве потсетам на зборовите на нашиот министер за надворешни работи Сергеј Лавров дека, се разбира, распоредувањето на воени контингенти на земјите-членки на НАТО на територијата на Украина не може да биде прифатливо за нас“, рече Песков.
Тоj одговaраше на новинарско прашање за намерата на британскиот премиер Кир Стармер на американскиот претседател Доналд Трамп да му претстави план за распоредување војници од европските земји во Украина.
Песков нагласи дека евентуалното распоредување на воени контингенти на НАТО во Украина предизвикува загриженост во Русија, која, како што рече, внимателно ги следи сите изјави.
Стармер изразил подготвеност да испрати британски војници во Украина доколку се постигне договор за ставање крај на војната со Русија, објавија во понеделникот британските медиуми.
Стармер призна дека тоа би можело да ги стави британските сили „во ризик“ доколку рускиот претседател Владимир Путин започне нов напад, пишува Гардијан, истакнувајќи дека тоа е првпат британски премиер експлицитно да потврди дека размислува да распореди британски мировници во Украина.
Британскиот премиер ги даде овие забелешки пред вонредниот самит со европските лидери во понеделникот во Париз, кој беше организиран за да се осмисли стратегија за да се спротивстави на напорите на американскиот претседател Доналд Трамп да постигне договор со рускиот претседател Владимир Путин и неговите најави за намалување на трошоците на САД за европската одбрана.
Стармер рече дека тоа е „егзистенцијално прашање за Европа“.
