Новите претседателски избори во Романија ќе се одржат на 4 мај, со можен втор круг 14 дена подоцна, објави романската влада.
Новите избори доаѓаат откако Уставниот суд ги поништи резултатите од првиот круг од претседателските избори во ноември.
„Усвоен е закон со кој се одредува датумот за претседателските избори во 2025 година“, рече владиниот портпарол, потврдувајќи го предлогот на коалицијата првиот круг од изборите да се одржи на 4 мај, а можен втор круг на 18.
Во првиот круг од претседателските избори во ноември минатата година, изненадувачки победи кандидатот на екстремната десница Калин Ѓеорѓеску. Нему во вториот круг требаше да му се спротивстави Елена Ласкони, проевропската кандидатка на зелено-либералната реформска партија УСР, но Уставниот суд го поништи резултатот од првиот круг.
Одлуката за поништување на изборите беше донесена откако романските разузнавачи предупредија на можноста за странско мешање во изборите. Тие особено ја истакнаа кампањата на Ѓорѓеску на мрежата ТикТок, за која велат дека била под руско влијание.
Романската влада во четвртокот издаде декрет со кој бара материјалите за изборната кампања да бидат јасно означени како изборна содржина и да бидат идентификувани нивните спонзори.
Ѓорѓеску се обиде преку домашното судство да ја оспори одлуката на Уставниот суд, која тој ја опиша како државен удар, но не успеа, па реши правдата да ја побара пред Европскиот суд за човекови права (ЕСЧП).
