Рускиот претседател Владимир Путин вчера изјави дека Туркије ги пренела новите предлози од Киев за преговори додека продолжува конфликтот меѓу Русија и Украина кој започна во февруари 2022 година.
„Неодамна турската страна ... се јави директно од Њујорк и рече дека има нови предлози од Украина што тие бараат да се разгледаат за преговори“, рече Путин на прес-конференцијата по 16. Самит на БРИКС во Казан, Русија.
Путин рече дека изразил подготвеност да се вклучи во разговорите, но тврди дека украинскиот претседател Владимир Зеленски ја отфрлил идејата за преговори веќе следниот ден. Тој додаде дека пред да продолжи со каков било предлог, Москва мора да утврди дали Украина навистина сака преговори.
Путин сугерираше дека неподготвеноста на Украина да се вклучи во разговори произлегува од импликациите на таквите преговори, особено од потребата да се укине воената состојба и одржување претседателски избори.
Тој додаде дека се подготвени да ја разгледаат секоја опција за мировен договор врз основа на ситуацијата на теренот.
Рускиот претседател се осврна и на преговорите одржани во 2022 година, за кои Туркије обезбеди платформа и тврди дека во тоа време бил постигнат нацрт-мировен договор.
„Ние сме му благодарни на претседателот на Туркије, г-дин Реџеп Таип Ердоган, кој еднаш ни обезбеди платформа за преговори со украинската делегација.“
Ниту турските, ниту украинските власти досега не ги коментираа изјавите на Путин.
Рускиот претседател не ги негираше американските тврдења дека Северна Кореја испратила свои војници во Русија, но рече дека Москва треба да одлучи како да го спроведе одбранбениот договор со Пјонгјанг и го обвини Западот за ескалација на војната во Украина.
САД во средата соопштија дека има докази дека Северна Кореја испратила околу 3.000 војници во Русија кои би можеле да бидат распоредени во Украина, потег што Западот би го гледал како значајна ескалација на војната во Украина.
На прашањето на новинарите за сателитски снимки на кои се гледа движењето на севернокорејските војници, Путин одговори дека „фотографиите се сериозна работа“ и додаде „ако има фотографии, тие кажуваат нешто“.
Но тој веднаш рече дека офицерите и инструкторите на НАТО се директно вклучени во војната во Украина и дека Западот е тој што ја ескалирал украинската криза.
„Знаеме кој е присутен таму, од кои земји од ЕУ и НАТО и како тие ја работат таа работа“, рече Путин.
Тој тврди дека руската армија напредува по целиот фронт и дека голем број украински војници се заробени во Курск.
„Подготвени сме да ја разгледаме секоја опција за мировен договор врз основа на реалната ситуација на теренот. Не сум подготвен за ништо друго“, истакна Путин.
