Уставниот суд на Романија ќе побара пребројување на гласовите во првиот круг од претседателските избори, јави денеска локалната ТВ Диги24, повикувајќи се на судски извори.
Портпаролот на Уставниот суд не сакаше да го потврди или негира извештајот.
По едноцифрената поддршка од гласачите во анкетите спроведени пред гласањето во неделата, екстремно десничарскиот независен политичар Калин Ѓорѓеску (62) извојува победа што го постави прашањето како е можно вакво изненадување во Европската унија и во земја членка на НАТО.
Тој ќе се натпреварува со лидерката на опозицијата Елена Ласкони во вториот круг од претседателските избори на 8 декември.
Ѓорѓеску доби многу гласови од млади гласачи и Романци кои живеат во странство, а неговата кампања во голема мера се потпираше на платформата за споделување видеа ТикТок.
Заменик-шефот на романската Агенција за телекомуникации, Павел Попеску, рече дека денеска ќе почне официјален процес со цел да се суспендира платформата ТикТок низ цела Романија во очекување на истрага за улогата што ја одиграла во првиот круг од претседателските избори одржани во неделата.
„Повикувам платформата ТикТок да биде суспендирана во Романија од 28 ноември додека државните институции не ја завршат истрагата во врска со манипулацијата со изборниот процес“, изјави вчера Попеску.
ТикТок ја отфрли таквата загриженост и изјави дека повеќето кандидати воделе кампања на платформата, како и на други социјални мрежи.
Вчера во Букурешт се одржа протест против Ѓеорѓеску, а демонстрантите носеа транспаренти со „Долу фашизмот, диктатурата и сексизмот“, „Нема да ја изневериме слободата за која се бореа хероите на револуцијата“, „Кој го финансира него?".
