Оштетувањата на двата танкери што превезувале сурова нафта во Средоземното Море во јануари и февруари најверојатно биле предизвикани од мини со тајмери прикачени на трупот на бродот, информираа за Ројтерс денеска три извори блиски до истрагата.
Експлозиите, кои се случија на грчките танкери Sea Charm и Sea Jewel, ја зголемија загриженоста за нови безбедносни закани во инаку безбедните води на Медитеранот, објави Ројтерс.
Сѐ уште не е јасно кој е одговорен за наводните напади.
Според извори и податоци за следење на движењето на бродовите, тие се закотвувале во руските пристаништа непосредно пред експлозиите.
Причината за оштетувањето на бродовите ја истражуваат грчките и италијанските власти.
Локацијата на експлозиите на трупот на пловните објекти, видот на експлозијата и други докази укажуваат на тоа дека биле користени мини кои со магнети биле прикачени на трупот на бродот, велат извори запознаени со истрагата.
