Властите на Руската Федерација соопштија дека Европската Унија ќе стане страна во конфликтот доколку воспостави мисија за воена помош за Украина.
Говорејќи на брифингот за новинарите во Москва, портпаролката на руското Министерство за надворешни работи, Марија Захарова, рече дека отворената, широка поддршка на Западот за украинските власти придонесува за продолжување на борбите.
Таа истакна дека САД ѝ обезбедуваат на Украина сателитски и други видови разузнавачки податоци и обучуваат милитанти.
„Секоја недела сѐ повеќе пари се слеваат во регионот, во рацете на режимот во Киев, за да не престанат борбите, за да загинат уште повеќе луѓе“, рече Захарова.
Таа нагласи дека украинскиот претседател Владимир Зеленски ги отфрлил мировните преговори со рускиот претседател Владимир Путин по налог на западните сили, нарекувајќи ги дел од политиката на продолжување на конфликтот.
„Ова е направено по налог на Западот, кој не сака крај на непријателствата, има намера да ги продолжи, како што велат меѓу себе, до последниот Украинец“, додаде Захарова.
