Рускиот претседател Владимир Путин нема да присуствува на собирот на лидерите на земјите од Групата 20 (Г20) на туристичкиот остров Бали следната недела, соопштија индонезиските и руските власти.
Наместо тоа, Путин ќе го претставува рускиот министер за надворешни работи Сергеј Лавров, соопштија официјалните лица во четвртокот.
Рускиот претседател виртуелно ќе се приклучи на еден од состаноците на самитот, изјави Џоди Махарди, портпарол на координативниот министер за поморство и инвестициски прашања на Индонезија.
Како домаќин на Г20, Индонезија се спротивстави на притисокот од западните земји и Украина да ја повлече својата покана до Путин од самитот и да ја исфрли Русија од групата поради војната во Украина, велејќи дека нема овластување да го стори тоа без консензус меѓу членките.
Портпаролот на руската амбасада во Индонезија потврди дека Путин нема да присуствува на самитот, но не даде дополнително објаснување.
Индонезискиот претседател Џоко Видодо се обидуваше да посредува во геополитичката тензија меѓу силите во Г20.
Состаноците оваа година вклучуваа напуштања и закани за бојкот предизвикани од тензиите околу војната во Украина, која Русија ја нарекува „специјална операција“.
Претседателот на Индонезија во неодамнешното интервју за Фајненшл тајмс рече дека Русија е добредојдена на самитот, за кој стравува дека ќе биде засенет од „многу загрижувачкиот“ пораст на меѓународните тензии.
„Г-20 не треба да биде политички форум. Наменет е да биде за економија и развој“, рече тој.
Индонезија, исто така, го покани украинскиот претседател Владимир Зеленски, кој рече дека нема да учествува доколку Путин учествува и дека се очекува виртуелно да се приклучи.
Голем број други светски лидери треба да присуствуваат на самитот што започнува на 15 ноември, меѓу кои и американскиот претседател Џо Бајден и кинескиот претседател Си Џинпинг.
