Динеш Гунавардена положи заклетва како нов премиер на Шри Ланка, еден ден откако Ранил Викремесинге го стори истото како претседател во време на најтешката финансиска криза во поновата историја на Шри Ланка.
Државниот оддел за информации соопшти дека Гунавардена, член на партијата Подујана Перамуна, кој претходно беше министер и член на парламентот, положи заклетва во присуство на Викремесинге во главниот град Коломбо во петокот наутро.
Неговата инаугурација, за време на која министрите на новата влада, исто така, дадоа заклетва, се случи неколку часа откако безбедносните сили уапсија девет лица во рација во главниот протестен камп во Коломбо за време на неколкунеделните немири.
Местото на премиерот остана празно откако Викремесинге победи на претседателските избори.
Поранешниот претседател Готабаја Раџапакса побегна од земјата во Сингапур откако неколкумесечните улични протести против економската криза во Шри Ланка ескалираа во социјални немири. Илјадници демонстранти упаднаа во претседателската палата во главниот град Коломбо и ја запалија куќата на премиерот. Братот на Раџапакса, Махинда, поднесе оставка како премиер во мај.
Во недостиг на девизни резерви по колапсот на нејзината економија зависна од туризмот, островската држава од 22 милиони жители не го исполни целиот свој надворешен долг.
Таа не можеше да плати храна, гориво и други основни потреби, а недостигот на гориво доведе до долгорочни прекини на електричната енергија. Училиштата се затворени, а државните службеници работат од дома.
Владата преговара со Меѓународниот монетарен фонд за пакет помош, но договорот се уште не е финализиран.
