Американскиот претседател Џо Бајден ќе присуствува на самитот на лидерите на Г7 во Италија следната недела, објави денеска Белата куќа.
Според портпаролката на Белата куќа, Карин Жан-Пјер за време на настанот од 13 до 14 јуни во Апулија, Бајден и лидерите на Г7 ќе разговараат за низа глобални прашања, вклучително и непоколебливата поддршка на Г7 за Украина.
„Лидерите ќе ги унапредат напорите за користење на замрзнатите суверени фондови на Русија за помош на Украина, како и активностите за продолжување на наметнувањето трошоци на Русија и на оние кои ги поддржуваат руските воени напори. Лидерите на Г7 ќе преземат чекори за промовирање на економската безбедност и отпорност“, се вели во соопштението од Белата куќа.
Се додава дека Бајден и лидерите на Г7 исто така ќе ја удвојат својата посветеност да ги поддржат земјите во развој кои сакаат да инвестираат во нивната иднина и да помогнат во зајакнувањето на безбедноста на храната и финансирањето на здравјето.
Групата Г7 е името на консултативниот форум на седумте индустриски најразвиени земји во светот. Се состои од премиерите на Соединетите Американски Држави, Канада, Јапонија, Германија, Италија, Франција и Велика Британија. На состаноците учествуваат и претставници на Европската унија и Европската комисија.
