Премиерот на Велика Британија, Кир Стармер, истакна дека тој е „подготвен и има волја“ да распореди британски војници во Украина за да се спроведе мировниот договор.
„Не го кажувам тоа лесно. Ја чувствувам многу длабоко одговорноста што доаѓа со потенцијалното ставање на британските војници во опасност“, напиша тој во написот за „Телеграф“.
„Но, секоја улога во помагањето да се гарантира безбедноста на Украина помага да се гарантира безбедноста на нашиот континент и безбедноста на оваа земја“, додаде тој.
Крајот на војната во Украина, „кога ќе дојде, не може да биде само привремена пауза пред (рускиот претседател Владимир) Путин повторно да нападне“, рече Стармер.
„Но, второ, додека европските земји мора да се зајакнат во овој момент, и ќе го направиме тоа, поддршката на САД ќе остане клучна, а американските безбедносни гаранции се суштински за трајниот мир, бидејќи само САД можат да го одвратат Путин од повторен напад“, додаде тој
Стармер истакна дека ќе се сретне со американскиот претседател Доналд Трамп во наредните денови и ќе соработува со него, заедно со сите земји од Г7, со цел да обезбеди „силен договор“ кој им е потребен.
„Мора да ни биде јасно дека мирот не може да дојде по секоја цена. Украина мора да биде на маса во овие преговори, бидејќи сè помалку од тоа би одело кон ставот на Путин дека Украина не е вистинска земја“, рече тој.
Стармер додаде дека украинскиот претседател Владимир Зеленски и украинскиот народ покажале извонредна отпорност и направиле огромни жртвувања во одбраната на својата земја.
„Не можеме да имаме друга ситуација како Авганистан, каде што САД директно преговараа со талибанците, а ја изоставија авганистанската Влада. Сигурен сум дека и претседателот Трамп ќе сака да го избегне ова.“
Стармер нагласи дека патот на Украина кон членството во НАТО е „неповратен“, нагласувајќи дека европските земји мора да ги зголемат издвојувањата за одбрана и да преземат „поголема улога“ во Алијансата.
