Поранешниот американски претседател Доналд Трамп во понеделникот вети дека повторно ќе воведе забрана за патување во САД и ќе спроведе „идеолошки проверки“ на имигрантите доколку биде реизбран за шеф на државата во 2024 година.
„Ќе спроведам силна идеолошка проверка на сите имигранти“, рече Трамп за време на предизборниот митинг во Дери, Њу Хемпшир, додавајќи:
„Ако ја мразите Америка, ако сакате да го запрете Израел, ако не ви се допаѓа нашата религија - што многумина од нив не ја сакаат - ако сочувствувате со џихадистите, тогаш не ве сакаме во нашата земја“.
За време на митингот Трамп продолжи со нападите врз актуелниот претседател Џо Бајден бидејќи, како што рече, не е „способен“ и ги става Соединетите Американски Држави на последно место.
Тврдејќи дека милиони илегални имигранти преминале во САД под администрацијата на Бајден, тој ги повтори своите планови да ги депортира.
„Ние сме како ѓубриште и никој ништо не прави за тоа“, рече тој.
Во врска со конфликтот во Газа, Трамп тврди дека одговорноста за сегашниот пресврт на Блискиот Исток е на администрацијата на Бајден.
